孤天寡九,唔打又一首
作者 : 湯文亮2019年2月8日
瀏覽人次 : 18885    回應 : 32
孤天寡九,唔打又一首
 
湯文亮博士
紀惠集團行政總裁
2019年2月8日

  在過年期間,我不時被人問現在是否可以買自住樓,因為有評論員話在去年十一月底,樓市已經開始谷底反彈,亦有評論員話樓市到了年初七,已經調整完成,再次向上攀升,如果現在唔買樓,恐怕會錯失良機,他們其實早已打算買樓,問我其實是多餘,不過在新年期間,很多事都是多餘,就算恭喜人都是多餘,當然是望人富貴,唔通希望別人閉翳,問我好不好買自住樓,一定要話好,唔通話唔好,但要想一個好答案,如果又學誠哥話量力而為,一定會被人噓。

  我記得第一次買樓,見到燊哥,順便問一問,燊哥知道我是澳門仔,不但是第一次買樓,而且資金不多,於是連想也不想就話,孤天寡九,唔打又一首,打天九的人知道,一副牌只有一隻天或者九,能夠結牌的機會很少,如果要結牌,一定要等到尾二才出牌打人,而最後一隻細牌又沒有被人打,但機會始終不大,但如果等結牌,隨時一揀都冇,有一楝輸三,一楝都冇輸五,所以,一般打天九的人揸住一隻天或者九的牌,倘若有機會,連考慮也不用,一定會大力打下去,唔識打天九的人未必會明白,香港好似是唔准打天九,因為天九可以隨時變成排九,天九牌就變成賭具,香港仍然是禁賭的。

  只有能力買自住樓的人就好似揸住一隻天或九,如果要考慮清楚,又擔心什麼什麼,始終買唔到樓,到最後樓價又升了,他們又後悔到不得了,其實只得一注錢買樓,就好似孤天寡九,還需要考慮什麼,買樓當然是有風險,但樓市長遠必升,現在唔買樓,可能永遠都唔會買,買樓的人如果只得一注錢,而又有需要的話,根本不用問其他人,孤天寡九,唔打又一首。

1. HKF 2019-02-08 11:08
香港仲有幾多人識打天九吖,就嚟連傳統麻雀都失傳,個個改打碰槓牌
2. 望東樓 2019-02-08 11:41
天九係中華文化精髓,麻雀閃埋一邊,不可以唔識。但係要搵齊腳打返場都唔容易。
3. 鳥5 2019-02-08 12:27
唉!。。。好難開口,隨時送尾宝。。。作最壞打算都要上,咁我個人(只係個人) 意見。。。 應該尊重D個朋友 決定。。 唔係值博率數學題, 既然得一注, 就係上天安排 大富由天 ,唔係個人選擇。。。 射唔到間屋 ,但可能換到個家。。。 呢個真係明
4. 鳥5 2019-02-08 12:28
無言, 即使hi大鑊 都仲係唔使死啫...
5. 鳥5 2019-02-08 12:34
有時見到D兩公婆 ,喪失十年財務自由, 情比金堅, 福禍不二,。。 有啲發咗達, 見利思遷。。 都唔係數學題呢!
6. 安多 2019-02-08 12:34
其實自住真係計掂數就好上車......等下一年等下又一年......您年齡都升 分分鐘等到人到中年 , 都是樓價又升左, 可以按揭既年數也減了...真係左一巴又一巴...
7. 鳥5 2019-02-08 12:42
不過 既然唔等都等到咁多年 在下 唔畀意見都畀啲 等到下年年尾 應該係熊市第一期波底。。。
9. 鳥5 2019-02-08 12:44
第一波底 ,應該係指返 樓價 返14至13年.... 在下本人都覺得要輸 不過第一注 應該唔會死人
10. 鳥5 2019-02-08 12:58
而家千萬 不要 舉自己 家人 做保人, 禍不及親人 就算贏到,都唔係本份。。。 自己輸到剝光豬, 都只係份內事。。 在下在下只係咁講啦! 咁樣輸極 最多只係財務自由 10年至20年, 禍不及親人
11. Stephen Woo 2019-02-08 15:35
謝謝博士
再次學習新東西
12. 82定律 2019-02-08 18:24
香港八成的物業是落在兩成人的手中。問題是我有冇決心,計劃及執行力去一步一步地令自己變成那兩成人的一份子。

13. 真真薯片 2019-02-08 18:41
其實唔需要樓價升,假設樓價30年後完全冇升跌,租30年樓同買樓比,30年後已經係超大分別,對只得一層樓既用家黎講,升同唔郁都贏(包埋通漲),租樓唯一贏既機會係租樓期內樓價跌幅超過租金支出,港樓長久以來長線都升,所以租得越耐,越容易輸,除非係日本

咁租租係咪輸梗?又未必,上年好多新界屋苑一跌就百幾萬,肯定多過一年租金,不過捕捉到機會既租轉買既又有約多個?
14. 鳥5 2019-02-08 19:47
可以用家咁計,2%~3%一年成本,十年5跌,睇跌要比3成。不過息計3%一年,睇升都係比3成十年。。。計晒租本,高位向下跌,4至5成上 就好穩。。。以後就关忍差事,。。。But,,,,, 借過窿另計。。。。 而家按揭貸款 超過一萬四千億
15. 冇得輸 2019-02-08 20:35
錢無限而地有限,可以起樓的地更是有限中的有限。

香港價在1920年時進入一元一尺時代。1960年升到以百元為一尺。而依家一尺都用萬元做單位。

未來三十年港樓升十倍以上好正常,因為印鈔的速度不可能封頂。
16. 請教14樓鳥5 2019-02-08 21:16
香港2018年第3季的M2為十四萬億,而家按揭為14000億,咁其實有乜問題?銀行是否仍可多做樓宇按揭業務?
17. 李澤西 2019-02-08 21:24
咁點解“地產神童”羅兆輝要燒炭?哈哈
18. 醒下啦 2019-02-08 22:52
成日掛住羅兆輝,成日沈迷在沙士的歲月。日本海嘯添,唔好去呀笨。😀
20. 李澤西 2019-02-09 08:54
咁點解成日掛住印鈔,沉迷在QE的歲月?而家全世界都縮減資產負債表,即係收水。醒下啦!哈哈
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。