專業機構投資者(完)結緣
作者 : 珍惜香港2017年6月29日
瀏覽人次 : 14737    回應 : 10
專業機構投資者(完)結緣
 
珍惜香港
專業機構投資者
SMIEEE.MSc(ICDE)
http://facebook.com/hongkongtruevalue/
2017年6月29日
前言

今日出文嘅主題,喺《結緣》,亦喺我《專業機構投資者系列》裡面,最後一篇文章。大家唔好誤會,我依然喺一個專業機構投資者,而我亦唔喺封筆,只不過唔再用呢個系列名啫。至於點解唔再用?哈哈!都幾無厘頭,因為個名太長囉!系列名咁長,往往淡化咗後面嘅主題,尤其當列响例如「全部文章回應」果類 LIST 入面果陣,就會睇到頭睇唔到尾。講真,主題,先至喺最重要嘛!

另一個較次要嘅原因,喺佢會令讀者錯覺,以為我嘅文章,一定喺講關於投資嘅項目,甚至推薦埋哂啲乜嘢投資法。雖然我唔介意遭人非議,話我掛羊頭賣狗肉,但如果真喺有人俾呢個名吸引,到睇咗成篇水蛇春咁長嘅文章之後至失望嘅話,咁始終唔喺太好嘅。

我諗公認最貼題嘅,應該喺第二篇《市場嘅角色》,呢篇嘢,仲上埋債券通。不過正如我响《遺憾》一文中話,我嘅目的,只喺要通過自己嘅分享,帶出有如做生意一般嘅投資之道,而唔喺要演啲乜嘢「三個十倍」。或者大家有所不知,原來《專業機構投資者系列》嘅出現,喺嚟自一位網友。兩年幾前,我同佢激起咗一場關於投資嘅爭辯拗咗成半年,最後仲拗到上「專業」呢個 TOPIC。兩個月後,我就順手開咗呢個系列,第一篇題為《所謂專業》。

所以今次既然喺完結篇,我就必須要多謝呢位署名「自我陶醉」嘅網友,呢個多謝喺真心。我想大家明白,响「因果」呢種錯綜複雜嘅關係裡面,喺無分好壞,亦無分對錯,只有「緣」。冇「自我陶醉」,就唔會有《專業機構投資者系列》,所以呢位網友,就喺呢個系列嘅「因」,即喺因「自我陶醉」而結緣。呢個緣,維持咗年半,都喺時候要劃上句號。

一個交代

《結緣》,可以喺「締結緣份」,亦喺可以喺「結束緣份」,咁今日嘅主題,究竟喺邊個意思?可以話兩者皆是。為咗唔令大家混淆,我會用「緣結」嚟代表後者。結緣也好,緣結也好,必然有因,所以一定要有所交代,我寫咁大篇前言,就喺要作出交代。正如一個男仔,無端端約一個女仔行街食飯,又唔喺要表白,而女方亦肯赴約喎。之後佢仲每個月約人地一次,談天說地,風雨不改,但唔知點解,約咗十幾廿次之後,就忽然間停咗,咁你估女方會點諗?都喺果句,結緣、緣結,必然有因,人地唔問,唔代表你唔使講,亦唔代表人地唔介意。或者男方以為,大家互不相欠,但其實,就喺欠咗一個交代。

所以待人處世,一定要有頭有尾,冇頭已經唔喺咁好,冇尾簡直就喺 BAD。正如我寫《致亞視員工的信》,只希望佢地把握最後機會,作出一個交代。全港七百幾萬人裡面,得果 160 位有呢個機會,但結果呢?真喺好可惜,可惜嘅,唔喺亞視,唔喺觀眾,亦唔喺香港人,而喺呢一班人自己。當日之後,冇人會記得佢地,而响佢地嘅人生歷程之中,果一日,亦不值一提。

講到交代,我又諗起鬍鬚曾。就今屆特首選舉,我為佢寫咗《出陣》、《政經》、《陣痛》三篇文章。我之所以欣賞呢位前財爺,除咗因為佢喺大師級之外,仲有佢果份待人處世嘅情操。選舉過後,緣結之時,亦不忘作出交代,之後完全退隱,不再為政事說三道四。仕途走到最後,能夠抓住時機,適時進、適時退,無論輸贏,都寫下光輝嘅終結,可謂不枉此生。

法式鬍鬚曾

記得法國總統大選前夕,我响湯博士嘅回應箱度留言,話馬克龍會贏,仲將佢形容為「法式鬍鬚曾」,又強調呢個唔喺預測。有網友自作聰明;講真,要威威嘅,使鬼等到果晚至嚟寫。強調唔喺預測,只喺唔想抽博士水。就如我話,聽朝太陽會响東邊昇起,唔喺西邊;結果到聽朝,個太陽真喺响東邊昇起喎!咁你話我威唔威?呢個算唔算預測?

我話馬克龍喺「法式鬍鬚曾」,有朋友嘅即時反應喺:有冇搞錯?年紀差好遠啫!佢地嘅共通點,當然唔喺响個年紀度,而喺兩者都具備化解陣痛,以及帶領一個國家或地區,步入新常態第三階段嘅政治能力。馬克龍出身建制,曾任經濟部長,亦跟當時嘅總統奧朗德有理念分歧,於是部署民望,適時辭職參選,最後以修補國家撕裂為大前提,以超過六成六嘅大比數普選勝出。咦?乜咁似邊個嘅?

好多人大惑不解,點解鬍鬚曾可以响兩個月之內爆紅,尤其喺果班泛民,簡直離地到冇人有。早前見卿姐訪問羅永聰果陣,仲死雞撐話當年通過預算案唔喺妥協。人地已經講得好清楚,喺要慢慢經營去令到大眾响價值上認同你,佢仲好寸人以前淨喺識寫 BLOG,搞乜呢幾個月咁受歡迎。睇嚟佢真喺要自我檢討一下,話哂貴為民主派元老級,做埋個 SHOW 妳睇都仲喺咁執迷不悟。人地已經部署咗兩年,早就認清香港條路應該要點行,不過唔知有幾多人睇得出?

港式馬克龍

有人問我,既然法國有馬克龍,香港有鬍鬚曾,咁點解法國得,香港就唔得?喺唔喺因為小圈子選舉?因為香港冇普選?可以話喺,亦可以話唔喺。吓?咁即喺點?我諗有一點好重要,就喺我地必須要從心底裡面認同,香港喺中國嘅一部份,一個城市,唔喺一個國家;唔肯承認自己喺中國人嘅,就唔好話自己喺香港人。我地冇普選,喺因為我地唔夠愛國,唔好誤會,我唔喺指港獨,果啲只喺少數;大家不如問心果句,點樣睇自己嘅祖國?有冇當內地人喺自己人?試問一個國家裡面,啲人民唔愛國嘅話,點可以有普選?呢個道理太簡單,唔好要我解釋。

結緣,除咗要有「因」,仲要有天時、地利、人和,而人和喺最重要,因為呢個就喺埋門一腳。芳間評論普遍認為,阿爺信唔過鬍鬚曾,呢個完全喺錯判。阿爺信唔過嘅,喺香港人,所以寧願放棄一個叻人,去揀一個妹仔,最多自己睇緊啲。可惜有一點,阿爺睇漏咗,香港喺一個資訊自由流通嘅社會,教下中史,要啲後生認識祖國,呢啲只喺基本嘢;用家長式嘅訓示,對抗式嘅打壓,更加唔會湊效。關鍵喺,你可唔可以令到人地,响價值上認同你

要解決社會上唔同嘅問題,我地喺須要對話,而唔喺須要對立」。

所以,港式馬克龍當選嘅話,港獨之類嘅激進本土派,就唔會有市場,既然冇市場,又使乜要「好打得」?就睇下人地,法式鬍鬚曾一出現,極右國民陣線,就即時失咗市場,只攞得果八席,少得可憐。不過投票率低,亦顯示咗法國人內心嘅矛盾,始終,喺要妥協嘛!ANYWAY,法國將有望成為,全球首個步入新常態第三階段嘅國家,各位拭目以待。至於香港,就冇呢個福份啦!無他嘅,大如美國都唔得,選咗個特佬出嚟;英國玩脫歐,提前大選又搞到一鑊粥咁。佢地欠嘅,就喺一個能夠化解陣痛嘅政治家,呢種政治家,喺好罕有,失咗嘅話,好難再搵到下一個囉!

離地嘅好打得

鬍鬚曾仕途之緣結,造就咗林鄭與香港結下五年之緣,呢個已經喺鐵一般嘅事實,所以都喺果句,我地當然要支持呢位新特首。記得當日我寄語林鄭,期望佢建立正確嘅宏觀理念同大原則,予以堅持,唔好只喺著眼於個執行性。但睇嚟呢個 MISSION 似乎太大,我諗有啲基礎嘢,佢真喺突破唔到,尤其喺果種離地。我唔喺指唔識搭地鐵買廁紙,或者俾錢乞丐之類果啲。

話說舊年年底,警方搗破咗一個跨國網上情緣呃錢集團,受害者都喺啲高學歷嘅專業女性,而林鄭呢,就正正喺呢一種。吓?唔喺嘛?乜咁大鑊?我唔喺講笑,唔得世故,就喺咁啦!你要呃鬍鬚曾,可謂難過登天,但要呃林鄭呢,就真喺易過借火,問題喺,你有冇一推夠照嘅沙紙先?不過咁,阿爺就喺貪佢呢味嘢,而果班鄉親、商界、金融界之類嘅持份者,咪又喺一樣!同林鄭傾,梗喺好過同鬍鬚曾傾。正如我話,所謂「好打得」,只不過喺流於表面,或者準確啲講,只適用於佢權限以內,而權限以外呢,就無能力。

所以,响權力在自己之上嘅人面前,佢喺 NO SAY。就算你唔喺在佢之上,只要唔喺响佢之下,一樣可以用啲佢唔識嘅專業嘢大佢,但如果你喺响佢下面呢,咁就慘啦!有網友話,冇一個領袖樣樣精,最重要喺識用人,林鄭唔識金融 NO PROBLEM,有任志剛喎!有名你叫啦,金融沙皇,真喺阿戊都識得揀,咁就叫識用人?最近有朋友提起,究竟任志剛好啲,定喺陳德霖好啲?我話好難比較,就好似李小龍同張三豐咁,邊個好啲,都要睇下响邊個時勢度。

過氣沙皇

大家唔好誤會,我依然好欣賞任志剛,當年錯過咗佢個簽名會,家陣都仲覺得幾可惜。只不過,金融沙皇嘅年代,真喺已經過去啦!最近見佢發表回歸廿周年感想,都仲話要用 08 年果套嚟救火。FINE,呢啲技術嘢,我唔評論,但既然講到咁擔心香港被邊緣化,咁做乜仲要撐林鄭?你話要做大個規模,講真,大得過成個祖國咩?我地喺要同中央爭取,例如响亞投行、一帶一路、國家對外融資、港元嘅定位以及同人民幣之間嘅相互關係等各方面,俾香港去擔當一個不可或缺嘅前線角色,而唔喺墨守依家呢個現狀,去做大個唔知乜叉不可或缺嘅規模!

就睇 CY,成日游去啲內地城市度 SELL 金融服務,乞求生意。內地各大城市之間,互有競爭,人地根本唔使俾面你,唔好乜叉都賴哂去港獨度。你喺要直接同阿爺去爭取,中央肯 GRANT 你嘅,啲內地城市就自然走嚟搵你傾,使乜周圍去乞?但阿爺今日唔信你喎!咁點算?慢慢經營囉!通過協商、通過承諾、通過表現,最終令對方响價值上認同你,呢家嘢,唔喺一個响上頭面前 NO SAY 嘅妹仔就做得到,旨意佢同阿爺爭取,真喺可以慳啲。

所以點解我話,金融沙皇嘅年代,已經一去不復返,就算冇 LOOK 過佢篇廿周年感想都知。就睇今次特首選舉,沙皇做咗林鄭嘅代言人,我話佢交行貨,已經好俾面。想當年佢撐唐英年果陣,都唔知幾威武,好一句「一個成功嘅行業,唔等於喺霸權」,記憶猶新,如今果鼓氣去咗邊?林鄭當選果日,我見沙皇响鏡頭度出現過兩次,第一次可稱之為「路人甲」,而第二次呢,就喺企响度等,一有機會就游埋去同林鄭握完手即閃。

主宰命運嘅人

所謂,觀人於微,唔知各位對呢兩個鏡頭,點樣睇法?我就睇到好多嘢。正如响《加辣.磚家》一文裡面,我話睇咗政府個加辣記者會,就發現到一啲唔講得嘅東東,到寫《出陣》嘅時候先至揭盅。兩個人之間嘅互動、神態、反應,加埋講嘢內容嘅理念分歧,就已經足以睇得出,邊個喺莊,邊個喺閒,同成件事情,大致上喺點樣發生。真喺唔好意思,我就喺留意埋哂啲咁嘢,唔喺點睇得出果啲所謂「現在嘅基礎因素」?幾日前,何柱國上 TVB 講清講楚,關於廿三條立法,個主持問咗佢三次,大家可以細心睇下何生嘅反應,今次我唔會開估。

主宰命運嘅,喺人,唔喺數字」;我曾經以呢個為題,寫過一系列回應。記得有朋友話過,我寫啲嘢好玄;最近亦有朋友問,唔知我指出形勢,定喺形勢依我嘅見解運行?我諗大家都聽過,人望高處,水向低流;你明白呢個道理之後,走去話啲水會流落下面,咁究竟你喺指出水會向低流,定喺啲水依你嘅見解流動?如果我話,阿爺信鬍鬚曾,多過信林鄭,肯定好多人會唔同意,喺唔喺?咁不如我問,你會唔會信得過,一個好易氹嘅妹仔?

組班疑雲

你用一個人,唔代表你信佢,只不過你認為佢啱你用啫。剛才我話,金融沙皇,阿戊都識得揀;莫講話林鄭唔識得用人,我諗佢連點先至算喺人才,都未必分得出,呢家嘢,阿爺一清二楚。話說林鄭組班果陣,遇到困難,好似話冇乜人肯落踏喎!無他嘅,邊有人用「熱廚房」嚟形容自己個政府架!至攞命果句口號:「有心、有力、有承擔」,每次聽到就想轉台。我第一次喺聽任志剛咁講,已經覺得好唔妥,唔知喺咪佢諗出嚟?喺嘅就真喺多得佢唔少。唔好問我呢句嘢有乜問題,最近有朋友問我點睇財爺戊,我話:「有心、有力、有承擔」囉!你估我喺褒佢,定喺貶佢?

所以呢,唔好淨喺識得賴啲乜嘢政治爭拗,傳媒監察之類,妳嘅下屬,最終都喺睇妳頭。妳咁叫人入局法,我喺人才都唔願跟妳,容乜易做到嘔血仲要俾妳問責。譚志源陳家強高永文相繼表態離任,究竟喺俾人叫走,定喺冇鞋挽屐走,各位自己判斷啦!跟住謠言滿天飛,例如話請陳美齡做教育局局長,擾攘一輪人地又否認,唔知喺真唔喺。不過有樣嘢就珍珠都冇咁真,就喺張德江義正詞嚴咁話,中央有責任監督公職人員嘅組成標準,仲話要制度化向特首「發出指令權」喎!嘩!搞乜?咁多屆特首上任都冇咁誇,呢屆真喺經典。背後發生過乜嘢事,阿爺有幾信林鄭,我諗唔使劃出腸啦!

結果原班過渡,乜嘢管治新風格、大換血、引入年青人、女性,之類之類,當然喺泡哂湯。未上任就已經受挫,真喺有啲同情佢,不過我都喺同情香港人多啲。响「新」班子入面,有位新面孔,嚟自民主黨嘅羅致光,未上場就話要搞啲乜叉資產增值稅、高收入人士多徵稅之類。我唔明白持呢種理念嘅人,點解可以入局,但當醒起家陣喺林鄭做特首呢,就真喺明白哂。呢個新局長,令我諗起一位地產網友,早排有篇回應,俾人擧咗上專欄,建議埋啲乜乜投資物業稅、樓宇增值稅同租管喎!呢啲針對金字塔中上層,遏抑上游動力,以及挑撥階層之間互鬥嘅消極施政,就連 CY 咁消極都冇去到咁盡。佢仲好講到自己咁撐鬍鬚曾,但人地喺話要團結社會,修補撕裂,而最重要喺,人地已經強調咗 N 次,話私樓一定唔會平!佢究竟有冇留心聽書?

來屆五年喺利好

寫咗咁長政治嘢,有一點我必須澄清,就喺我嘅目的,唔喺要踩邊個特首。正如我話,响「因果」呢種錯綜複雜嘅關係裡面,喺無分好壞,亦無分對錯,只有「緣」。我只喺想帶出,今次換屆之後,嚟緊呢五年,香港嘅畫面會喺點。記得當年,我批 CY,會為香港帶嚟橫運,批消極施政,會令社會撕裂,結果中哂。但另一方面,香港經濟強勁,金融穩健,樓市堅固,皆因香港喺一處匯聚人才同投資嘅福地,而呢個就喺我地「現在嘅基礎因素」,而嚟緊五年,呢個因素,亦唔會改變。

啱啱提到果位網友,最近嘅文章,講到香港政治格局嘅明顯改變,呢個「因」,我基本上同意,不過佢推斷嘅「果」,我就不敢恭維。如果有人以為,阿爺會打壓樓價,幫你地班香港人上車,就可謂太天真。人地得鬼閒同你話果啲「大孖沙」作對,只不過喺响佢地手上,攞番香港經濟命脈嘅話事權啫!

近年有內地企業,响香港插緊旗,佢地以天價入貨。我早前已經話過,唔好笑人地接火棒,更加唔好以為人地會蝕錢沽番出嚟益你。就好似恆大、海航呢啲,冇阿爺默許,喺冇可能走得到出嚟掃貨。尤其喺海航,竟然有人以為,金管局收緊地產商建築貸款,喺針對呢啲中資,但又唔去 CHECK 清楚,人地同香港銀行借錢,個借貸比都只喺四成幾。唔單止咁,海航仲走去掃曼哈頓摩天大廈買德銀買香港王牌基金集團。如果就咁 SCAN 下人地個資產負債表,就判佢地唔掂,咁美國咪死得?依家呢個世界,已經唔同哂,唔通仲學過氣沙皇咁,用番 08 年套思維?

簡單而言,嚟緊呢五年,香港嘅政治、經濟、金融、以及樓市呢啲命脈,將會由阿爺全面操控。至於妹仔,就當然喺做番啲妹仔嘢,例如社福、教育之類,洗下錢派下糖,俾啲甜頭為所謂社會撕裂降下溫囉!不過幾有效呢,我就唔喺咁睇好啦!總之,大人嘢細路唔好搭咀,阿爺全面話事。而作為長線投資者呢,當然喺睇好,點解?香港經濟強勁,金融穩健,樓市堅固,阿爺會保住哂呢啲嘢,咁我地又何必介意,邊個話事?

因果錯配

所以都喺果句,响「因果」呢種錯綜複雜嘅關係裡面,喺無分好壞,亦無分對錯,只有「緣」。冇「自我陶醉」,就唔會有《專業機構投資者系列》。同樣地,冇爆煲論,就唔會有三傻嘅離去;冇三傻嘅離去,就唔會有「」;冇「序」,就唔會有資深會員專欄。最近我將《法子》嘅訪問放上專欄,有朋友問法子會否回歸,我話,既然資深會員專欄嘅出現,喺由三傻離去而觸發,咁回歸入資深會員專欄,就喺因果錯配,既然喺因果錯配,就唔會發生。

好多矛盾,都喺源自因果錯配,例如社會矛盾、中港矛盾之類。正如我話,有啲嘢,香港唔得,喺因為我地唔夠愛國。要化解因果錯配,只有一個辦法,就喺感因。

緣結

或者各位有所不知,資深會員專欄嘅前身,喺地產論壇。專欄也好,論壇也好,都只喺一個名稱,就好似《專業機構投資者系列》咁,唔一定篇篇貼題嘅。咁究竟呢度喺專欄,定只喺個論壇?呢家嘢,當然喺由網主決定啦!

專業機構投資者(一)所謂專業
專業機構投資者(二)市場嘅角色
專業機構投資者(三)致亞視員工的信
專業機構投資者(四)明燈.答案
專業機構投資者(五)加辣.磚家
專業機構投資者(六)歸邊
專業機構投資者(七)遺憾
專業機構投資者(八)出陣
專業機構投資者(九)政經
專業機構投資者(十)陣痛

《專業機構投資者系列》已經寫咗十一篇,年半前結緣,今日緣結於此。沒有死亡,就沒有重生,沒有緣結,就沒有結緣。下次出文,將會喺一個新嘅系列,至於個系列名喺乜,哈哈,未諗到喎!咁幾時會再出文?

未知何時!

宮崎駿:永遠常在
1. Roger Li 2017-06-29 09:16
An excellent articles with deep and convincing analysis.  Thanks indeed for 珍惜香港 and look forward for your excellent writing in the coming future.  
2. AH-HO 2017-06-29 09:21
沙發。
好長,要慢慢消化。
3. 打工仔 Andy 2017-06-29 09:25
珍兄
仲以為係完結 ! 哈哈!
4. 青蛙 2017-06-29 10:03
終於找到自我陶醉的貢獻了🐸
5. littlemun 2017-06-29 10:21
謝謝珍兄無私分享!

6. 八十後 2017-06-29 17:19
珍兄十分有心,近年已經少見這些文章了,真的感謝。期望珍兄能再出鴻文。
7. 惜緣 2017-06-30 00:02
謝謝珍港兄的分享!
8. 肥婆四 2017-06-30 07:17
感恩!透心文章,致无限敬意!
9. 占士 2017-06-30 14:32

謝珍兄好文分享! 您看事物總是看得那麼透徹,令在下非常佩服。期望早日可以拜讀您另一個系列的文章。謝謝!

10. Sugar 2017-06-30 23:06
同意占士,多謝珍港前輩。
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。