瀏覽人次 : 17290    回應 : 5
茶餐廳亂話(194)施政報告前買樓,是錯抑或對
 
湯文亮博士
紀惠集團行政總裁
2017年10月12日

  今早去到茶餐廳,老闆話有熟客很擔心,理由是他的兒子在施政報告前買了樓,因為物業代理話如果唔買,林鄭有九成機會會在施政報告出新辣招,或者會再收緊按揭成數,所以有買就要趁手,物業代理這一招的確有效,在施政報告前一日二手樓成交量比平日多一倍,我個人雖然主張一定要等施政報告後才買樓,不過,如果買中型或者大型單位又作別論,因為施政報告主要針對升幅巨大的細價樓,而且一定會從供應著手,供應增加,細價樓樓價自然會下跌。

  老實說,我發夢也想不到林鄭準備大量增加綠置居,吸納有能力買私人樓宇的公屋居民,再將他們空置出的公屋單位租給那些輪候上樓的人,這個一石二鳥策略一定有高人指點,而綠置居恆常化,將會嚴重影響細價樓樓價,連一向睇好樓市,無論出現什麼狀況都會解釋為令到樓價上升的物業代理都改口風,話綠置居恆常化對同類型住宅單位有輕微影響,但當我了解到那位熟客的兒子買的是過千呎,市值超過二千萬的大型單位之後立刻恭喜他,因為,首置上車方案將會釋放不少中大型單位購買力,樓價反而會上升,其實我也不大肯定,既然已經是事實,唯有安慰那位熟客。

我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

登入ID 或 網名 密碼
1. 十一哥 2017-10-12 10:51:12
逆週期措施敗筆在政策分層、開始時將閒資趕咗去細價樓、老散等等下發茅、成為送尾摸頂果浸、似足股市老千擺嘅局、而家係好唔理想…有乜依郁…輸嘅係一大遍、尤其大孖沙之前幫客打碼…盡推…未必一定係春江鴨…可能真係智商高。


2. 博士粉絲 2017-10-12 11:24:35
首置上車方案將會釋放不少中大型單位購買力,樓價反而會上升

呢點真係唔太睇得明,細價樓未來睇跌少左人買,購買力轉買大價樓推升大價樓嗎?

而家按揭收到咁緊,就算細價樓睇跌唔敢買,都唔一定有錢比首期買大價樓掛?

唔好話2000萬,假設層樓只值1000萬,又有幾多人拎到500萬現金比首期黎買?

如果話層細價樓升值,自己加錢換大價樓,但博士又覺得細價樓會跌,要細換大難度大左唔係咁易啵?


3. 首置上車盤 2017-10-12 12:10:35
首置上車盤的入息上限咁低,家庭月入得果6萬8,真的不明白如何可以供$1000萬以上的中大型樓?
4. 水客 2017-10-12 19:32:37
多谢林太。我可以来来回回走水货。有錢津貼啦😜😜😜😜😜😜
5. 真真薯片 2017-10-12 23:32:03
所謂大量綠置居, 係用本身已經有既公屋轉做綠置居, 定係搵到額外既地起綠置居先?

如果用本身既公屋轉做綠置居, 在下睇唔到有咩分別, 舊公屋住一伙人, 新公屋又住一伙人, 兩伙人都租公屋, 如果將新公屋轉做綠置居, 效果係舊公屋住一伙人, 新公屋變成綠置居又住一伙人, 有咩分別?除非你話舊公屋果伙人本來打算除其中一個住戶名出黎買私樓收租, 咁你塞間綠置居比呢個家庭, 消耗左佢既本錢, 就少一戶人出黎搶新樓………不過呢類人住開公屋, 冇得加按換首期, 佔新樓買家有幾多呢?在下就唔認為會好多囉